Gobara Ta Lakume Dukiyoyi Sama da Naira Biliyan 5 a Kasuwar Singer da ke Kano

An samu mummunar gobara a Kasuwar Singer da ke Kano wadda ta lalata dukiyoyi da aka kiyasta darajarsu ta haura Naira biliyan 5.

 

 

 

Shugaban kasuwar, Junaid Zakari, ya bayyana hakan yayin da yake zantawa da manema labarai kan irin barnar da gobarar ta yi, inda ya bayyana lamarin a matsayin ɗaya daga cikin mafi muni a tarihin kasuwar.

 

 

 

 

A cewarsa, gobarar ta cinna wa gine-ginen zama guda hudu wuta, waɗanda ke ɗauke da sama da kananan ‘yan kasuwa 1,000. Lamarin ya jefa su cikin asara mai tsanani, domin kayayyaki, injuna da sauran muhimman kadarori sun kone kurmus.

 

 

 

Zakari ya ƙara da cewa mutane bakwai sun ɓace a lokacin da ake haɗa wannan rahoto, inda ya ce ana ci gaba da bincike domin gano halin da suke ciki ko suna raye ko kuwa sun rasu.

 

 

 

Ya bayyana cewa jami’an agajin gaggawa da hukumomin tsaro na aiki tukuru domin gano musabbabin tashin gobarar.

 

 

 

Shugaban kasuwar ya bayyana lamarin a matsayin babban bala’i da ba za a manta da shi ba a tarihin kasuwar Singer, tare da jaddada buƙatar tallafi cikin gaggawa domin taimaka wa waɗanda abin ya shafa su farfaɗo da sana’o’insu.

 

 

 

 

Sai dai ya yaba da ziyarar da Gwamnan Jihar Kano, Abba Kabir Yusuf, ya kai wurin yayin da gobarar ke ci gaba da tashi, yana mai cewa hakan ya nuna damuwa da goyon bayan gwamnati ga waɗanda abin ya shafa.

 

 

 

 

Har yanzu hukumomi ba su fitar da sanarwar hukuma kan musabbabin gobarar ba, yayin da ‘yan kasuwar da abin ya shafa ke ci gaba da ƙoƙarin ceto abin da ya rage daga cikin dukiyoyinsu.