Gwamnan jahar Kano Abba kabir yusuf nashirin komawa jam,iyyar APC Ranar Litinin

Gwamnan Jihar Kano, Alhaji Abba Kabir Yusuf, na shirin komawa jam’iyyar All Progressives Congress (APC) a ranar Litinin, 26 ga Janairu, 2026, bayan ya fice daga jam’iyyar New Nigeria Peoples Party (NNPP) a ranar Juma’ar da ta gabata, kamar yadda wata ssanarwa ta bakin kakakinsa.

Sanarwar, wadda Darakta-Janar na Yaɗa Labarai da Hulɗa da Jama’a na Gidan Gwamnatin Kano, Sunusi Bature Dawakin Tofa, ya sanya wa hannu, ta bayyana matakin gwamnan a ranar Lahadi.

Sanarwar ta tunatar da cewa Gwamna Yusuf ya fara shiga APC ne a shekarar 2014, lokacin da ya lashe zaɓen fidda gwani na jam’iyyar domin kujerar Sanatan Kano ta Tsakiya, amma daga bisani ya mika wannan dama ga Sanata Rabiu Musa Kwankwaso.

Ta ƙara da cewa bayan shekaru na fafutukar siyasa a jam’iyyu daban-daban, ciki har da zama na baya-bayan nan a NNPP, halin da ake ciki na tafiyar da mulki, haɗin kan ƙasa da bunƙasar ci gaba sun sa ya ga dacewar komawarsa APC, wadda ya bayyana a matsayin jam’iyya da ya saba da ita kuma mai tsari wajen tafiyar da mulkin ci gaba.

An ruwaito Gwamna Yusuf yana cewa komawarsa APC zai “ƙara ƙarfafa haɗin gwiwa da Gwamnatin Tarayya, hanzarta bunƙasa ababen more rayuwa, inganta haɗin kai a harkokin tsaro da kuma kyautata ayyukan hidima ga al’ummar Jihar Kano.”

Ya ƙara da cewa wannan mataki zai kuma “ƙarfafa kwanciyar hankalin siyasa da haɗin kan al’umma a jihar.”

Ana sa ran gwamnan zai yi rajista a hukumance a matsayin mamba na APC a Kano a ranar Litinin, tare da ‘yan Majalisar Dokokin Jiha 22, ‘yan Majalisar Wakilai 8 da kuma Shugabannin Kananan Hukumomi 44.

Haka kuma ana sa ran zai ƙaddamar da rajistar APC ta yanar gizo (e-registration) a hukumance a jihar a wannan rana.